मुंबई, दि. ९ : बुटीबोरी येथील फूडपार्क प्रकल्पास इमारत पूर्णत्वाचा दाखला देण्याबाबत कृषी, उद्योग विभाग, एमआयडीसी शासनाच्या मार्गदर्शक सूचनांप्रमाणे विभागाकडून मत घेवून कार्यवाही करण्याचे निर्देश कृषिमंत्री दत्तात्रय भरणे यांनी दिले.
मंत्रालयातील दालनात नागपूर जिल्ह्यातील बुटीबोरी येथील फूडपार्क प्रकल्पास इमारतींचा पूर्णत्वाचा दाखला देण्याबाबत बैठक आयोजित करण्यात आली. बैठकीत कृषि मंत्री दत्तात्रय भरणे बोलत होते. यावेळी या बैठकीला सचिव परिमल सिंह, महाराष्ट्र कृषी उद्योग विकास महामंडळाचे व्यवस्थापकीय संचालक अशोक काकडे, उपसचिव संतोष कराड यासह संबंधित अधिकारी उपस्थित होते.
नागपूर जिल्ह्यातील बुटीबोरी येथील फूडपार्क प्रकल्पास इमारतींचा पूर्णत्वाचा दाखला मिळण्यात आलेल्या अडचणी आणि त्याअनुषंगाने आकारण्यात आलेल्या दंडाच्या माफीबाबत बैठकीत चर्चा करण्यात आली. या बैठकीत प्रकल्पाची पार्श्वभूमी, जमीन संपादन, पायाभूत सुविधा उभारणी, भाडेकरार, तसेच महाराष्ट्र औद्योगिक विकास महामंडळाकडून (एमआयडीसी) आकारण्यात आलेल्या थकबाकीचा सविस्तर आढावा घेण्यात आला. कृषि मंत्री दत्तात्रय भरणे म्हणाले की, या प्रकल्पाच्या सार्वजनिक हिताचा विचार करून संबंधित इमारतींना पूर्णत्वाचा दाखला देणे आणि आकारलेला दंड माफ करण्याबाबत शासनस्तरावर सकारात्मक विचार करण्याची आवश्यकता आहे. धोरणात्मक बाब म्हणून चर्चा करून मुख्यमंत्री यांच्या मंजुरीनंतर याबाबत निर्णय घेण्यात येईल असेही ते म्हणाले.
००००
संध्या गरवारे/विसंअ
